አዲስ የካፒታል ዕቃ ፋይናንስ ንግድ ሥራ አ.ማ.

አዲስ የካፒታል ዕቃ ፋይናንስ ንግድ ሥራ አክሲዮን ማኅበር ዓላማ አድርጎ የተነሳው በልዩ ልዩ የኢንቨስትመንት መስኮች ለመሳተፍ ፍላጎት፣ ዕውቀት እና ሙያ ኖሯቸው በካፒታል እጥረት ምክንያት መሥራት ላልቻሉ ኢንተርፕራይዞች የተወሰነ የጊዜ ገደብና ቅድመ ሁኔታዎች አስቀምጦ የካፒታል ዕቃን በማቅረብ (በሟሟላት) የፋይናንስ እጥረታቸውን መቅረፍ ነው። 

በሃገራችን ለመጀመሪያ ጊዜ በተዘጋጀው የሊዝ የፋይናንስ ስርዓት የካፒታል ዕቃዎች ኪራይ አገልግሎት ሂደት ተጠቃሚ በመሆን የካፒታል እቃ ባለቤት መሆን ይቻላል። መሟላት ያለባቸውን መመዘኛዎች (መስፈርቶች) ይዞ በመቅረብ እና በመዝገብ አገልግሎቱን ተጠቅሞ ሥራን ለማሳደግ እና የተሻለ ገቢን ለማግኘት ያስችላል።

ኩባንያው በአሁን ሰዓት ለሁሉም የከተማችን ነዋሪዎች አገልግሎቱን ተደራሽ ለማድረግ በየክፍለ ከተሞች ቅርንጫፍ ጽሕፈት ቤቶችን በመክፈት አገልግሎት በመስጠት ላይ ይገኛል።

አዲስ የካፒታል ዕቃ ፋይናንስ ንግድ ሥራ አ.ማ. ማን ነው?

ምሥረታ

አዲስ የካፒታል ዕቃ ፋይናንስ ንግድ ሥራ አ.ማ. የአዲስ አበባ ከተማ አስተዳደር ከሌሎች የከተማው የልማት ተቋማት ጋር በመሆን በ2006 ዓ.ም. የተቋቋመ የካፒታል ዕቃ አቅራቢ ተቋም ነው። በዋናነት በማኑፋክቸሪንግ ዘርፍ ለተሰማሩና ለሚሰማሩ የጥቃቅን፣ አነስተኛና መካከለኛ ኢንተርፕራይዞች በጥናት መሠረት የማምረቻ መሣሪያዎችን ገዝቶ በማቅረብ የካፒታል ዕቃ ፋይናንስ አገልግሎት መስጠት ዓላማው ነው። ኩባንያው ለጥቃቅን፣ አነስተኛ እና መካከለኛ ኢንተርፕራይዞች፣ ለቴክኒክና ሙያ ትምህርት እና ዩኒቨርሲቲ ተመራቂዎች፣ ለሴት ሥራ ፈጣሪዎች፣ ለተመረጡ ስኬታማ የንግድ ተቋማት ዕሴት የሚጨምርና ተደራሽ የሆነ የካፒታል ዕቃ ፋይናንስ መደገፍ ላይ ትኩረት አድርጎ በመንቀሳቀስ ውጤታማ የካፒታል ዕቃ አቅርቦት ስርዓት የመገንባትን ተልእኮ በመወጣት ላይ ይገኛል።

የኩባንያው ራዕይ

በ2025 (እ.ኤ.አ) ቀጣይነቱና አስተማማኝነቱን ያረጋገጠ በምስራቅ አፍሪካ ደረጃ ሞዴል የሆነ የካፒታል እቃ ፋይናንስ አገልግሎት አቅራቢ ኩባንያ መሆን 

የኩባንያው ተልዕኮ

እውቀት እና ሙያ ኖሯቸው በጥቃቅን፣ አነስተኛና መካከለኛ ኢንተርፕራይዞች የተደራጁ ወይም ለመደራጀት ፍላጎት ኖሯቸው በካፒታል እጥረት ምክንያት ሥራቸውን ማስፋት ላልቻሉ ኢንተርፕራይዞች ቀጣይ እና አስተማማኝነት ያለው የካፒታል ዕቃ ፋይናንስ አገልግሎት መስጠት ነው።

ማስታወሻ፦ ይሄ መረጃ የተዘጋጀው አዲስ የካፒታል ዕቃ ፋይናንስ ንግድ ሥራ አክሲዮን ማህበር በአካል ሄዶ በመጠየቅ በተገኘው መረጃ ላይ ተመሥርቶ ለጥቃቅን እና አነስተኛ ድርጅቶች በሚጠቅም መልኩ ተቀናብሮ ነው።