ተቋርጦ የከረመው የሞባይል ኢንተርኔት አገልግሎት ተመለሰ

ባለፈው ሳምንት በአዲስ አበባ የዋይ-ፋይ የኢንተርኔት አገልግሎት መመለሱ ይታወቃል። በርካታ ተጠቃሚ ያለው የሞባይል ኢንተርኔት አገልግሎት ደግሞ ዛሬ ሐሙስ በበርካታ ስፍራዎች ላይ አገልግሎት መስጠት ጀምሯል።

የኢትዮጵያ መንግሥት ለኢንተርኔት አገልግሎት መቋረጥ እንደ ዋነኛ ምክንያት የጠቀሰው አንዳንድ ወገኖች ግጭት እና አለመረጋጋትን የሚያባብሱ የጥላቻ መልዕክቶችን ለማሰራጨት እየተጠቀሙበት መሆኑን ነው።

በጠቅላይ ሚኒስትሩ ጽህፈት ቤት ፕሬስ ሴክሬታሪያት የሆኑት ቢልለኔ ስዩም በወቅቱ ለቢቢሲ እንዳሉት የኢንተርኔት አገልግሎት የብሔር ጥላቻን ለማስፋፋት ጥቅም ላይ በመዋሉ መንግሥት አገሪቱንና ሕዝቡን የመጠበቅ ኃላፊነት ስላለበት ለማቋረጥ መገደዱን ተናግረዋል።

በጠቅላይ ሚኒስትሩ ጽህፈት ቤት የዴሞክራሲ ግንባታ ሚኒስትር የሆኑት አቶ ዛዲግ አብረሃ በበኩላቸው ኢንተርኔት በአንዳንድ ወገኖች ለጥላቻ ንግግር ማሰራጫ መሳሪያ እንደተደረገ ጠቅሰዋል፤ በብሔሮችና በሃይማኖቶች መካከል ግጭቶች እንዲቀሰቀስ መሳሪያ በመሆኑ እንዲቋረጥ መደረጉንም አመልክተዋል።

አቶ ዛዲግ ጨምረውም “መምረጥ የነበረብን በመረጃ ነጻ ፍሰት እና በሕዝባችን ሕይወት መካከል ነበር፤ በዚህም ለሰው ልጅ ሕይወት ቅድሚያ ሰጥተናል” ብለው የተወሰደው እርምጃ የዜጎችን ደኅንነት ከመጠበቅ አንጻር መሆኑን አመልክተዋል።

የአገሪቱ ባለስልጣናት የኢንተርኔት አገልግሎትን በማቋረጣቸው ከተለያዩ ወገኖች ትችት እና ወቀሳ ሲቀርብባቸው የሰነበተ ሲሆን፣ ምላሻቸው “የነበረው አለመረጋጋት ወደነበረበት ሲመለስ የኢንተርኔት አገልግሎቱ ይቀጥላል” የሚል ነበር።

እነሆ ባለፈው ሳምንት የዋይ-ፋይ አግልግሎት ዛሬ ደግሞ የሞባይል ኢንርተኔት አገልግሎት በበርካታ ቦታዎች ላይ ወደ ሥራ መመለሱ ተነግሯል።

የዜና ምንጭ፦ ቢቢሲ አማርኛ